Finici

Quantu volti c'hè parsu d'avè compiu d'asista

Dichjarendu scumparsu l'ardori di risista,

Piinghjendu a svintura d'un populu afflittu

Di veda a so cultura mora senza un zittu

​

Quantu volti a pena ammantò a baldanza
Da fa chì quì l'avvena fussi senza spiranza,

Smattendu quissa fiamma di passioni sincera è fendu d'ugni brama un intima chimera.

​

Ma da a cinnara è u focu

Sguassendu i vinici,
Volta sempri pocu à pocu

L'alba d'un dumani filici,

Da risanà u nosciu locu

Cum'è rinasci un finici.

​

Quanti volti a sorti ci pridicò ruvina

Sarrendu ci i porti d'una gioia vicina,

Mandendu à caternu ugni vechja divizia

In u bughju eternu di a falza ghjustizia

​

Quantu volti u celi par nò duvintò scuru
Da sottu à u veli d'un tempu troppu duru

Strughjendu ugni prumessa di paci è binistà

 D'un isula sottumessa in circa di libartà

​

Ma da a cinnara è u focu

Sguassendu i vinici,
Volta sempri pocu à pocu

L'alba d'un dumani filici,

Da risanà u nosciu locu

Cum'è rinasci un finici.

Supranendu i to vinici

È tutti li to disfatti

Rinasci com’un finici

È inventi d’altri patti...

 

​